אגרת ד'קנא*
ז' אדר, תשט"ז · ברוקלין.
אין ענטפער אויף אייער בריף פון ה' אדר חדש שמרבין בו בשמחה, אין וועלכען איר שרייבט ועוגען דער התעוררות לתשובה וכו' און שרייבט אויך אז איר ווילט אפקומען מיט תעניתים, און זיכער מיינט איר דאס כפשוטו.
און מיין מיינונג אין דעם איז ווי עס שרייבט רבנו הזקן בעל התניא והשולחן ערוך, אז בדורותינו אלה, וואס דער תענית בריינגט צו חולי אדער מיחוש, חס ושלום ניט דאס איז די וועג פון תשובה, נאר מען דארף מערער לערנען און דאוונען תפלה בצבור און ווי געהעריג איז און בפרט אין זאגען תהלים. און בנוגע צו תעניתים, איז טאן אין דעם ווי די הוראה פון כ"ק אדמו"ר מוהר"ש, תענית איז א עבודה, טראכט אלע טאג 15 מינוט אדעתי' דנפשי' וועגען זיך (זעה ספר התולדות אדמו"ר מוהר"ש, הוצאת קה"ת ה'תש"ז, ברוקלין, ע' 72). - כמובן געמיינט אז דער טראכטען זאל בריינגען להוספה בתורה ומצות.
זעלבסט פארשטענדליך אז דאס אויבען געזאגטע וועגען תענית, איז דאס ניט געמיינט די תעניתים וועלכע זיינען על פי שולחן ערוך, ווי תענית אסתר וכו' וואס בנוגע צו די תעניתים דארפמען פרעגען א רב, וועלכער זאל פסק'נן בהתאם צום געזונט.
אויך האט איר געדארפט יעדער וואכען טאג פארן דאוונען, געבען א פאר סענט אויף צדקה, און אנהאלטען די דריי שיעורים השוים לכל נפש מתקנת כ"ק מו"ח אדמו"ר זצוקללה"ה נבג"מ זי"ע, בחומש תהלים ותניא. א)זאגען יעדער טאג נאכן דאוונען אין דער פריה, דעם שיעור תהלים - ווי דער תהלים איז פארטיילט אויף די טעג פון חדש. ב) לערנען יעדער טעג א פרשה חומש מיט פירוש רש"י פון דער סדרה פון דער וואך (זונטאג פון אנהויב סדרה ביז פרשת שני, מאנטאג פון פרשת שני ביז שלישי א. א. וו.). ג) לערנען יעדער טאג א שיעור תניא, ווי דער תניא איז פארטיילט אויף די טעג פון יאר. און השי"ת זאל אייך מצליח זיין אין דאס אלעס אויבען געזאגטע.
יובא מ: igros-index · Kehot Publication Society · commercial · העותק השמור ב־RebbeHub
הצעת תיקוןנשלח לבדיקה
דיווח על בעיהבלי חשבון
הטמעה באתר אחר
על הדף
פרטים
- חיבור
- אגרות קודש
- כרך
- חלק יב
- מזהה
- rh-6s2zcf9f
עותקים
פעילות אחרונה
עוד לא הוצע כאן תיקון ולא דווחה בעיה.
מקורות
- sichos-kodesh-unit