אגרות קודש
אגרת ח'תשצא
צו דער יערלעכער מסיבה פון די "נציבי
תמימים ליובאוויטש אין מאנטרעאל,
די יערלעכע מסיבה קומט היי-יאר פאר באלד נאך דעם יארצייט פון כ"ק אדמו"ר מוהרש"ב נ"ע, דער גרינדער פון דער ערשטער ישיבה "תומכי-תמימים" אין ליובאוויטש, צוזאמען מיט זיין זון, מיין שווער כ"ק אדמו"ר נ"ע, דער מיט-גרינדער און מנהל פועל פון דער ישיבה אין ליובאוויטש און דער גרינדער פון דער ליובאוויטשער ישיבה אין מאנטרעאל.
איינע פון די אנווייזונגען פון דעם בעל-ההילולא, וואס איז ספעציעל וויכטיג פאר אונזער צייט, איז:
אין דער איצטיגער צייט, קען מען ניט, און מען טאר ניט, מאכן חשבונות וואס עס לאזט זיך אפטאן און וואס ניט; נאר דאס וואס עס פאדערט אן אויסבעסערונג - מוז מען זיך גלייך פארנעמען דערמיט מיט אנגעשטרענגטע כוחות, און דאן העלפט דער אויבערשטער.
די דאזיגע הוראה איז באזונדערס נוגע דעם געביט פון חינוך. אויב מיט יארן צוריק האט מען נאך געקענט טראכטן אין געוויסע פאראנטווארטלעכע קרייזן, וואס מען קען און וואס מען קען ניט פארלאנגען פון דעם נייעם דור, און ווי אזוי "צוצוציען" זיי אד"ג.
איז אבער איצט גאנץ קלאר, אז דער איינציגער צוגאנג צו חינוך איז אוועקצושטעלן דעם חינוך אויף די פעסטע יסודות פון תורה און מצוות, אן פשרות און אן פארוואסערונגען, נאר מיט דעם ענטגילטיגען באשלוס, אז מ'דארף און מ'מוז אין דעם טאן מיט אנגעשטרענגטע כוחות. דאן איז מען געזיכערט, אז מען פירט אויס מיט ג-ט'ס הילף אין דער פולסטער מאס.
בפרט אז אונזער דור שרעקט זיך ניט פאר אן ארויספאדערונג ("טשאלענדזש") און איז שטענדיג מער גרייט אויפצונעמען דעם פולן אמת ווי א האלבן-אמת, אדער א פערטל-אמת.
און דאס איז דער צוגאנג פון "תומכי-תמימים", וואס דער נאמען אליין ווייזט שוין אויף תורת ה' תמימה - די ג-טלעכע תורה, סיי נגלה דתורה און סיי פנימיות התורה, תורת החסידות - איז איינע און א גאנצע; און די תלמידים תמימים - זיינען גאנצע, גאנצע אין זייערע השקפה און גאנצע אין זייערע הנהגה.
די הצלחה, בעזרת ה', פון דער ליובאוויטשער ישיבה תומכי-תמימים אין מאנטרעאל האט באשטעטיגט ווי ריכטיג דער צוגאנג איז. עס איז צו האפן, אז די חשובע בעלי-בתים, וועלכע האבן דערמעגלעכט דעם כסדר'דיגען וואוקס, אין כמות און אין איכות, פון דער ישיבה אין פארלויף פון די אלע יארן, וועלן אויך ווייטער אנשטרענגען אלע כוחות צו דערהאלטן און נאך מער אויסברייטערן אלע טעטיקייטן פון דער ישיבה.
דער זכות פון החזקת התורה און הפצת התורה והמצוות וועט זיכער אלעמען ביישטיין, יעדן איינעם און איינער שי', אין אלץ וואס מען נויטיגט זיך, בגשמיות וברוחניות.
יובא מ: igros-index · Kehot Publication Society · commercial · העותק השמור ב־RebbeHub
הצעת תיקוןנשלח לבדיקה
דיווח על בעיהבלי חשבון
הטמעה באתר אחר
על הדף
פרטים
- חיבור
- אגרות קודש
- כרך
- חלק כג
- מזהה
- rh-5y9ee0g4
עותקים
פעילות אחרונה
עוד לא הוצע כאן תיקון ולא דווחה בעיה.
מקורות
- sichos-kodesh-unit